ശല്ക്കം ഒഴിഞ്ഞവർ
ഇവിടെയുപേക്ഷിക്കുന്നു
കോപവും പിണക്കവും അഹങ്കാരവും
കൊടിയ രഹസ്യങ്ങളും സ്പർദ്ധയും
വിമർശനവും നിഗളവും ഒന്നിച്ചായ്
വലതുകാൽ വച്ചൊരു പടിയിറക്കം
ഇരുകണ്ണും കാലിലെ പെരുവിരൽ തുമ്പിലെ
കാണും നഖത്തിന്റെ ചലനങ്ങളിൽ
ദിക്കില്ല ദിശയില്ല നീണ്ടൊരു വഴിയില്ല
പേടിപ്പെടുത്തുവാൻ ചുറ്റിനുമാളില്ല
തൂങ്ങിയ മടിശീലക്കനവുമില്ല
പരിചയം നടിക്കുന്ന പാഴ്സ്വപ്നക്കാരില്ല
കൈനീട്ടി യാചിക്കും കൂട്ടരില്ല.
ഏകാന്തത്തടവിലെ കാരുണ്യക്കനവിലെ
വേറിട്ട സ്വർണ്ണവർണ്ണമായൊരു ചങ്ങലകൾ
മുൻജന്മ സുകൃതം രുചി നോക്കിപ്പൊട്ടിയ
നീറുന്ന പിടിപോയ പുരുഷാര്‍ത്ഥങ്ങള്‍.
മുന്നിൽ ഗമിക്കുന്ന ഇളകുന്നൊരരൂപിയാം
മായയാം ഊന്നുവടിയിലഭയവുമർപ്പിച്ചു
ഒടുങ്ങാത്ത തിരകളെണ്ണുവാൻ കഴിയാതെ
തിരിച്ചു വരുവാനറിയാത്ത മടക്കയാത്ര.