വോട്ട് ചെയ്യുക
എന്റെ നാട്ടിലൊരു തിരഞ്ഞടുപ്പ്
കാഹളം മുഴങ്ങിയിരിക്കുന്നു
കുട്ടിക്കളിയില്ല പടയൊരുക്കം മാത്രം
നിറമുള്ള കൊടികൾ മുന്നിലും
നിര്‍ദ്ദയരായ മനുഷ്യര് പിന്നിലും
സാഷ്ടാംഗ പ്രണാമവും
തൊഴുകൈയ്യോടെ ഒട്ടിച്ചു വച്ച ചിരിയും
അതുവരെ കണ്ടാൽ മിണ്ടാത്തവരോടും
വിലയേറിയ വോട്ടുകളൊക്കെയും
തരണേ എന്നപേക്ഷിക്കണം
വാഗ്ദാനങ്ങളുടെ പെരുമ്പറ കൊട്ടണം
പൊതുജനത്തിനറിയാം വാഗ്ദാനം
പറയുന്നവരുടെ അവകാശമാണെന്ന്
തരത്തിലും തഞ്ചത്തിലും കളിക്കണം
നാടോടുമ്പോൾ നടുവെയോടണം
പള്ളിയിലോ മസ്ജീതിലോ
അമ്പലത്തിലോ മതേതരം പറയരുത്
വേഷവിധാനം സിമ്പിൾ ആകണം
സ്ഥാനാര്‍ത്ഥി മന്ദബുദ്ധിയായാലും
കൂടെയുള്ളവർ കൂർമ്മബുദ്ധിമാന്മാരാകണം
എന്നാലേ പല സാഹചര്യങ്ങളിലും
തടിയൂരാൻ സാധിക്കുകയുള്ളൂ
അത്രക്കും രാഷ്ട്രീയരംഗം മോശമായി
ഇല്ലാവചനങ്ങൾ മറു ചെവിയിലൂടെ
പുറത്തേക്ക് പോകട്ടെ
അപ്പോൾ നല്ല തൊലിക്കട്ടിയോടെ
ലക്ഷ്യപ്രാപ്തി മാത്രം ചിന്തിക്കുക
ഖദർ ആയാലും കാക്കിയായാലും
ഒരു ജന്മനിയോഗം പോലെ
ഏതോ മാസ്മര അലകളിൽ പെട്ട്
വിലയേറിയ വോട്ടുകൾ ഓരോന്നായി
കിരീടധാരണം സാദ്ധ്യമാക്കും
-------------ഓ.പി.---------------