കുഞ്ഞുറങ്ങട്ടെ
-----------കുഞ്ഞുറങ്ങട്ടെ----------
ധനു മാസ പുലരിയില്‍ വിടർന്നോരു മലരിന്റെ,
തലയാട്ടം കാണാനായി കാത്തു നിന്നു.
മഞ്ഞിന്‍ കണങ്ങള്‍ കഴുകി തുടച്ചൊരു,
മുഖബിംബം കാണുവാന്‍ കഴിഞ്ഞതില്ല.
ചിരകാല സ്വപ്‌നങ്ങൾ കോർത്തു വച്ചന്നു,
ഞാന്‍, പാടി പതിഞ്ഞോരീരടികള്‍,
താരാട്ടു പാട്ടായ് പാടിയുറക്കാം ,നിന്‍,
പാതിയുറങ്ങിയ പൈതലിനെ .
കുഞ്ഞിളം തെന്നലോന്നാട്ടിയുറക്കാന്‍,
തെന്നിയിറങ്ങിയലഞ്ഞിടുമ്പോള്‍,
ശീതള കൈകള്‍ കൊണ്ടെന്റെയീ കുഞ്ഞിനെ,
വാരിയെടുത്തുമ്മ, വച്ചിടല്ലേ.
അമ്മിഞ്ഞപ്പാലിന്റെ, മാധുര്യം ഏറ്റൊരു,
മന്ദഹാസത്തിന്‍ ചിറകിലേറി,
അമ്മതന്‍ സായൂജ്യ , അർച്ചനാസ്വപ്നങ്ങള്‍,
കണ്‍നിറച്ചോന്നുനീ, കാണുക ,മാരുതാ.